Nú verður Føroya fyrsta Backyard Ultrarenning veruleiki. 30. september klokkan 09.00 skipar Bragdið fyri Havnardalur Backyard Ultra 2023.

 

Backyard-renning er ein luftalsliga nýggjur kappingarháttur, har tað ikki snýr seg um at renna skjótt, men um at halda út og vera tolin og treyst/ur. Í Backyard-renning eru eingir aldursbólkar og heldur ikki eru kynini býtt sundur. Her er bara ein bólkur. Tó er aldursmark sett til 18 ár.

 

Reglurnar eru einfaldar. Byrjað verður á hvørjum heilum tíma at renna frá start til mál, 6,7056 km. Hetta skal klárast innan ein tíma, tí á næsta heila tímanum byrjar næsta umfar. Soleiðis verður hildið fram, til bert ein luttakari er eftir, sum fullførir eitt umfar. Renniteinurin er frá Spíranum, runt fjósini, út eftir Liasarvegi, oman við Sandá, út til Velbastaðvegin og niðan aftur til Spíran. Fyribils teinurin er lagdur út á Fatmap, har tað eisini ber til at taka eina GPX-fílu niður. Tá teinurin er endaliga fastlagdur, verður mynd av teininum løgd út. Teinurin er 6,7056 km.

 

Í millum umførini ber til at hvíla/sova, eta, fara á wc, skifta klæði og skógvar o.s.fr. Alt eftir, hvussu nógva tíð man hevur eftir. Luttakarar hava alt við, sum teir vænta at teir fáa brúk fyri. Stól, madrassu, dýnu, soviposa, mat, gels, vætu, skiftiklæðir, ymisk pør av skóm o.s.fr. Sólsetur er kl. 19.00, so tey, ið vænta at renna longri, mugu hava lykt við. Fyriskipararnir bjóða eina lítla máltíð triðja hvønn tíma. Kl. 12.00, 15.00, 18.00 o.s.fr. Tann matskráin verður kunngjørd 14 dagar undan kappingini.

 

Startur og mál verður við Spíran og felagshúsini hjá Ríðifelagnum, sum eisini verður høvuðssæti fyri kappingina. Her verður pláss hjá hvørjum einstøkum at innrætta seg á einum lítlum øki við sínari útgerð. Kostnaðurin fyri luttøku er 300 kr. Við í prísinum er ein t-skjúrta - treytað av at meldað verður til í seinasta lagi 17. september 2023. Tit fáa ein t-post seinni, har vit m.a. spyrja um stødd og slag. Sum nevnt er eisini ábit triðja hvønn tíma við í prísinum. Kalt vatn, kókað vatn, kaffi og the, frukt og orkudrykkur stendur klárt alla tíðina.

 

Av tí at hetta er fyrstu ferð vit royna hetta, verður luttakaratalið avmarkað til 40. Sostatt verða tað tey fyrstu 40, sum melda til, sum fáa pláss. Aldursmarkið er 18 ár. Hvør luttakari kann í mesta lagi hava ein hjálpara inni í húsunum millum støðgirnar Altjóða reglusett fyri renningina: https://backyardultra.com/rules/

 

Tiltakið sæst eisini á enskum á altjóða Backyard Ultra heimasíðuni.

 

Fylg okkum á Facebook, Instagram og Mastodon.